Baie welkom in Namakwaland!
Hier volg so paar dorpe om te besoek en dinge om te doen:
Namakwaland word beskryf as 'n semi-woestyn area wat rofweg strek vanaf die Oranjeriviermond tot by die Olifantsriviermond aan die weste en ongeveer tot die Bokkeveldberge en Aggeneys. Die streek word gekenmerk deur 'n lae reënval met 'n hoë verdampingspotensiaal, maar ook deur mis vanuit die Atlantiese oseaan. Die naam Namakwaland kan opgedeel word as volg: Nama (die mense van die area, afstammelinge van die Khoi-koi mense. Hulle is gekenmerk deur trek boerdery waar hulle in hierdie gebied en gedeeltes van Namibië getrek het met hul vee volgens seisoen en die beskikbaarheid van weiding); Kwa (in die kliektale verwys hierdie klank na man of mense), en land verwys dat hierdie die area is waarin hulle geleef het. Die totale oppervlak van die omgewing beslaan bykans
440 000km2.
Die geheel van Namakwaland word verdeel in die Noord-Kaap sowel as die Wes-Kaap en het verskeie dorp en nedersettings wat in die gebied val. Dit word ook verdeel in 5 streke wat volg van Suid na Noord:
- Knersvlakte
- Hardeveld
- Namakwaland se Klipkoppe
- Richtersveld (word nie bespreek)
- Kusvlakte van Namakwaland (Sandveld)
Elke streek het unieke eienskappe en ook blomme wat net in hierdie streke aard
Knersvlakte
Die Knersvlakte is 'n dorre streek in die noordelike deel van die Wes-Kaap met 'n wye verskeidenheid dwergvetplante wat hier voorkom. Meer as 50% van die vetplante wat hier voorkom is endemies tot die streek en kom nêrens anders in die wêreld voor nie. Hierdie gebied is geweldig onder druk a.g.v. plant-stropery en nie toeganklik vir die publiek nie. Die naam verwys waarskynlik na die dorre, waterlose landskap en die smart wat reisigers in die ou dae hier te beurt geval het. Hier moet jy behoorlik op jou tande kners om te kan oorleef as jy hier sou wou boer. Met ’n reënval so min as tussen 40 - 60mm per jaar en feitlik geen bosse of bome om die vee te voed in die droeë somer maande nie, kan ’n stuk grond maklik oorbewei word.
Daar word ook vertel dat die naam Knersvlakte gegee is deur die destydse trekboere wat van een area na die volgende moes trek vir weiding en die staal wande van die ossewa-wiele het ’n knersgeluid gemaak wanneer dit deur die dorre vlakte getrek was.
'n Deel van die Knersvlakte is met stukkies kwarts bedek en in hierdie streek groei baie endemiese plante, veral vygies. Die Knersvlakte-natuurreservaat is in 2014 deur CapeNature en die Wêreldnatuurlewefonds (WWF) gestig om die endemiese plantegroei van die Knersvlakte te beskerm.
Namaqua Lodge Vanrhynsdorp
Geleë in die hartjie van Vanrhynsdorp, bied Namaqua Lodge die ideale basis vir jou Namakwaland-avontuur. Met gerieflike kamers, vriendelike diens, heerlike etes en geriewe soos WiFi, veilige parkering en 'n kroeg op die perseel, is dit 'n tuiste weg van die huis.
027 219 1633
Vanrhynsdorp NG Kerk Blommemark
Besoek NG Kerk Vanrhynsdorp se Blommemark tussen 1 Augustus tot 5 September 2025.
Oop Maandae tot Saterdae 09:00 tot 16:00
Vele handgemaakte produkte, gebak, kunswerk, ingelegte produkte, speelgoed, naaldwerk en meer.
Middagetes is ook beskikbaar.
Vir meer inligting, kontak 066 213 6879.
Kokerboom Kwekery
Besoek Vanrhynsdorp se Kokerboom Kwekery - kwekers van seldsame vetplante en kokerbome. Hier kan jy gekweekte vetplante koop om saam te neem huistoe.
Vir meer inligting, kontak vir Christine 076 391 4700.
Gifberg Holiday Farm
Besoek Gifberg Holiday Farm met besonderse staproetes en swemgate. Of drink 'n heerlike koppie rooibos tee by hulle restaurant.
Kontak vir Jansu by 078 614 6484.
Bagdad Cafe
Stop by Bagdad Cafe oppad na Nieuwoudtville vir 'n heerlike koppie moerkoffie of roosterbrood.
Vir besprekings of meer inligting, kontak 084 065 8464.
Hardeveld
Die Hardeveld gebied het sy naam gekry vanweë die harde graniet onderlaag wat vlak onder die bogrond is. Hierdie area is vee wêreld, omdat verbouïngs-boedery nie hier beoefen kan word nie. Dorpe in hierdie streek is Nuwerus en Bitterfontein.
Nuwerus
Die naam verwys na die dae wat poskoetse en togryers nog ’n halfweg russtop tussen Vanrhynsdorp en Garies nodig gehad het. Die dorpie, Bitterfontein en omliggende plase was altyd deel van die NG gemeente Vanrhynsdorp, maar in 1920 besluit die gemeente om eerder ook ’n kerk te stig vir hierdie area omdat daar reeds mense hier en in die omliggende omgewing woon. Hulle noem toe die gemeente Nuwerus, vanweë die nuwe rus wat gevind is op die lang tog in Namakwaland. Die gemeente het op daardie stadium ’n area van 160 km bedien.
'n Interessante staaltjie uit die geskiedenis van die plaaslike hoërskool is dat die bouplanne deur die onderwysdepartement met dié van 'n baie groter dorp omgeruil is, so dat Nuwerus nog altyd 'n skool gehad het wat veels te groot is vir 'n dorpie van sy grootte.
Bitterfontein
“Bitterfontein is ’n dorpie so klein in die hart van Namakwaland, daar is niks in die winter en niks in die somer, net die son wat brand” - só sing Worsie Visser oor hierdie dorpie.
Die spoorlyn vanaf Kaapstad het die dorp in 1927 bereik en was vir die langste tyd die enigste manier wat enige iets of enige iemand Namakwaland binne gekom het of uit gegaan het. Die koper uit die omgewing van Springbok is ook deur Jowells-Transport hierheen vervoer per vragmotor en van hier is dit na Tafelbaai versent.
Namakwaland se Klipkoppe
Hierdie gedeelte word beskou as die ware Namakwaland deur die plaaslike inwoners en het kenmerkende ronde, klipagtige granietheuwels wat deur sanderige vlaktes geskei word.
Garies
Maak seker jy stop by Sonja by Garies Toeristestal vir die lekkerste roomys! Jy moet een van haar gratis padkaarte neem sodat jy nie verdwaal tussen al die blommeprag nie.
Kusvlakte van Namakwaland (Sandveld)
Hierdie is ’n strook van so 30km wyd en strek vanaf die Oranjerivier in die noorde tot by die Olifantsrivier in die suide. Die streek het kenmerkende los witsand teen die kus wat al rooier raak soos dit binneland in beweeg. Die plantegroei in die streek is nie veel hoër as 30cm teen die kus en kan tot ’n meter in die binneland groei. Vygies en vygiebosse is volop. In die gebied is baie gemeenskaplike grond wat deur die plaaslike mense gebruik word om met kleinvee te boer. Hier skuil rotsagtige strande met skeepswrakke en pragtige witstrande wat jy vir kilometers ver kan sien.
Dorpe in die streek sluit in;
- Oranjemund
- Alexanderbaai
- Port Nolloth
- Kleinzee
- Hondeklipbaai
Verskeie kleiner nedersettings is ook in die omgewing. Die Namakwa Nasionale Park met verskeie kampeer opsies val ook in die omgewing.
Olifantsriviervallei
Die Olifantsriviervallei strek langs die Olifantsrivier vanaf Citrusdal deur Clanwilliam, Klawer, Vredendal en Lutzville area. Die reënval is 100 tot 200mm per jaar naby Vredendal en 400 tot 500mm per jaar in die Clanwilliam-Citrusdal area. Die plantegroei in die noordelike deel van die vallei bestaan meestal uit vygies en kraalbos, terwyl die streek tussen Clanwilliam en Citrusdal meestal bestaan uit die Clanwilliam-daisy en skilpadbessiebos. Hierdie streek word gebruik meestal vir kleinveeboerdery en voorsien ook 'n groot deel sitrus en groente. Danksy die Bulshoekdam word verskeie besproeïngsboerderye in hierdie gebied toegepas.
Clanwilliam
Strassbergers Skoenfabriek
Voordat jy die plate blomme aandurf, moet jy die regte paar veldskoene aanskaf! By Strassbergers het hulle iets vir almal - oud en jonk. Besoek vir oom Hannes en hy sal jou help om jou nuwe beste vriend vir jou voete uit te kies.
Adres: Ou Kaapsestraat 12, Clanwilliam
Kontaknommer:: 027 482 1461
Webtuiste: https://strassbergers.co.za
Velskoendraai Plaasstal & Restaurant
Begin jou dag reg met 'n heerlike koppie boeretroos by Velskoendraai. Of kry vir jou 'n "take-away" rooibos cappuccino met 'n heerlike sny koek. Voor jy weer die pad aandurf na die blomme, moet jy 'n foto neem van jou koffie of die pragtige gebou. Plaas die foto of Facebook, tag ons en gebruik die hutsmerk #namakwaskattejag!
Adres: Graafwaterstraat, Clanwilliam
Kontaknommer: 066 205 2382
C. Louis Leipoldt se graf
Wanneer jy deur die majestueuse Pakhuisberge ry, stop by C. Louis Leipoldt se graf en luister na sy gedig Oktobermaand, voorgedra deur Mike Spies. Volg hierdie skakel: https://www.facebook.com/namakwatoere/videos/1069404671565814
Ramskop Natuurreservaat
Die Ramskop Natuurreservaat is een van Clanwilliam se juwele, wat elke jaar tussen Augustus en September spog met die grootste verskeidenheid blomme. Hierdie natuurreservaat spog met oor die 350 verskillende spesies, gemerkte staproetes met pragtige uitkykpunte oor die berge en Clanwilliam dam, en 'n seisoenale teetuin tydens blommetyd.
Die Clanwilliam Blommeskou word aangebied vanaf 29 Augustus tot 7 September by die Blomkerk.
De Kelder Restaurant
Besoek De Kelder Restaurant vir heerlike etes, ontsnap in die heerlike atmosfeer en neem die uitsig van die Sederberge in!
Maandae: 16:00-00:00
Dinsdae - Saterdae: 11:00-00:00
022 482 1037
Klawer
Stop by Klawer Wynkelder en proe hulle African Ruby Rooibos Vermouth - 'n egte Suid-Afrikaanse produk met rooibos en boegoe. Hierdie sal beslis jou beste vriend wees op 'n koud dag!
Kontaknommer: 027 216 1530
Webtuiste: https://www.klawerwine.co.za
Lutzville
Wanneer jy Lutzville besoek, moet jy ’n wynproe beleef by Lutzville Vineyards. Vra vir Susan, neem ’n “selfie” saam met haar, laai dit op Facebook en gebruik ook die hutsmerk: #namakwaskattejag
Kontaknommer: 027 217 1516
Webtuiste: https://lutzvillevineyards.com
Maak gerus ’n draai by Lutzville se Hotel en drink ’n Jagermeister saam met Boetie Fox!
Biedouwvallei
Die Biedouwrivier, suid-oos van Clanwilliam, is ’n sytak van die Doringrivier en lê suid van die Biedouwberg. Die reënval in hierdie streek wissel tussen 200 tot 400mm per jaar en die plantegroei bestaan meestal uit spesies van die vygie familie wat ’n pragtige prentjie van mooi blomme teen die berge skep. Die boere in hierdie area skuif hulle skape na ander areas gedurende die blommeseisoen sodat die blomme op hulle beste kan wees vir toeriste.
Nieuwoudtville/Bokkeveld
Nieuwoudtville - die bolplant hoofstad van die wêreld!
Die Bokkeveld het sy naam gekry meer as 250 jaar gelede deur die eerste settelaars as gevolg van die groot hoeveelheid wild wat hier voorkom het - meestal sebras, wildebeeste en springbokke.
Die eerste botanis wat die Bokkeveldplato besoek het, was Carl Peter Thunberg van Swede, in 1774.
Die betowering tot die Bokkeveldplato is sekerlik die diversiteit in plantegroei wat soms verbasende en skerp kontraste in plantelewe toon.
Nieuwoudtville NG Kerk
Wanneer jy Nieuwoudtville besoek, moet jy aanklop by die pragtige NG kerk met 'n ryk geskiedenis. Loop deur die kerk, neem die skoonheid in en ontmoet die vark in die verhaal.
Maak ook 'n draai by die kerksaal vir Nieuwoudtville se Blommemark tussen 7 Augustus en 13 September. (Maandae tot Saterdae 09:00 - 16:00)
Willemsrivier
Besoek die plaas WIllemsrivier met sy ryke geskiedenis en die mooiste rooikatsterte!
Neem 'n foto by die katsterte en plaas dit op Facebook met die hutsmerk: #namakwaskattejag
Matjiesfontein Padstal
Beleef die blommeprag van Matjiesfontein Plaas net buite Nieuwoudtville. Hier haal hulle die skape vroegtydig van die lande af, voor die eerste reën van die seisoen val, om die mooiste blomme vir toeriste te verseker.
Neem die blommeroete, lê tussen die blomme en neem baie foto's. Onthou net om dit op Facebook te plaas met die hutsmerk #namakwaskattejag
Gannabos Kokerboomwoud
Maak 'n draai by die grootste Kokerboomwoud in die suidelike halfrond. Loop deur die kokerbome en sien hoe nie een dieselfde lyk nie. Kyk na elkeen se verskillende vorm, grootte en kleur.
Neem 'n foto tussen die kokerbome en plaas dit op Facebook met die volgende hutsmerk: #namakwaskattejag
Weskus
Dit is die streek aan die westelike kuslyn van Suid-Afrika. Die Weskus is 'n skatkis van unieke besienswaardighede waar geskiedenis, kultuur en natuur hande vat. Van ou vissersdorpe tot asemrowende strande - hier is vir elke besoeker iets besonders om te ontdek.
Doringbaai
Besoek die bekende Fryer’s Cove by die ou kreeffabriek. Geniet ’n glasie van hul smaaklike wyn, stap op die jetty en ruik die vars seelug. Neem ’n foto op die jetty met die see in die agtergrond of voor die lighuis. Plaas dit op Facebook en gebruik die hutsmerk: #namakwalandskattejag
Elandsbaai
Hier moet jy die bobbejaan van Bobbejaanberg gaan ontmoet. Klop aan by Elandsbaai Hotel en geniet ’n yskoue bier op die stoep waar jy uitkyk oor die see. As jy die bobbejaan sien, neem ’n foto en plaas dit op Facebook met die hutsmerk: #namakwalandskattejag
Paternoster
Wanneer jy deur die Weskus ry, moet jy ’n vars vis en chips parcel geniet teen die see. Besoek die vriendelike dames by Paternoster se “kaai?” en bederf jouself met egte Weskus vis en chips.
Laai hierdie speellys af wanneer jy in ons kontrei kuier!
CONTACT US
+27 (0) 27 219 1377
+27 (0) 66 385 4653
22 Voortrekker Street | Vanrhynsdorp | Western Cape | South Africa | 8170